“20minutes”: “Shqiponjat” e Xhakës e Shaqirit nuk janë aspak politike

Debati për festimet e Granit Xhakës e Xherdan Shaqirit të golave kundër Serbisë po vazhdon edhe më tutje.

Mediumi zviceran “20minutes” ka biseduar me profesorë e njohës të rrethanave të Kosovës e Serbisë.

Sipas specialistit për Ballkanin, Loic Tregoures, veprimi i lojtarëve të Zvicrës nuk paraqet asnjë kuptim politik.

“Veprimi i tyre kuptohet nga i gjithë populli shqiptar dhe paraqet shqiponjën e flamurit shqiptar. Nuk ka asnjë kuptim politik. Është një shenjë identiteti siç e kanë edhe vendet tjera. Nëse do ta bënin atë kundër Portugalisë apo Anglisë, për shembull, askush nuk do të prekej”, thotë ligjëruesi i Institutit Katolik të Parisit.

Mediumi më tej thotë se pas fishkëllimave nga fansat e Serbisë, disa nga të cilët bartnin fanella me imazhin e kriminelit të luftës Ratko Mladiq, lojtarët e Zvicrës kanë dashur t’u përgjigjen atyre provokimeve.

Për Xherdan Shaqirin e Granit Xhakën është e vështirë të jenë neutralë kur dihet se babai i Xhakës ka qenë i burgosur politik nga Serbia.

“Është një veprim i bërë nën ndikimin e emocionit dhe historisë personale. Mund të jetë fatkeqe për shkak të tensioneve mes Kosovës e Serbisë, por për mua nuk është veprim politik. Meqenëse Kampionati Botëror është shumë i përhapur, veprimet e tyre ngjallën reagime. Por është një epifenomen në nivel diplomatik. Kjo nuk do ta ndryshojë situatën”, ka thënë Odile Perrot, drejtoreshë e Shkencave Politike dhe specialiste për Kosovën.

Tutje, mediumi zviceran në gjuhën franceze, përmend edhe përkrahjen që djemtë morën në Kosovë, nga i madh e i vogël – madje edhe duke mbledhur fonde për t’ua paguar gjobat.

Por, Tregoures thotë se ndonëse në Zvicër ka nga ata që janë hezitues ndaj shqiptarëve të Kosovës, në këtë rast i përkrahën.

“Edhe në Zvicër pari përkrahje për këta lojtarë. Është paksa qesharake sepse në Zvicër, është një pjesë e shoqërisë që janë shumë hezitues në raport me shqiptarët e Kosovës dhe emigrantëve në përgjithësi. Por në këtë rast, i përkrahim ata”, thotë ai.

Por, reagimet janë krejtësisht të kundërta në Serbi, ku u nxit një skandal diplomatik. Ndonëse Federata Serbe e Futbollit u gjobit me 46,780 euro nga FIFA për mesazhet diskriminuese nga fansat e tyre gjatë ndeshjes kundër Zvicrës, shqiponja vështirë të kapërdihet nga ta.

“Serbët pretendojnë se kjo shqiponjë i referohet ‘Shqipërisë së Madhe’ (bashkimi i të gjithë shqiptarëve të Ballkanit në një shtet). Por, kjo nuk është e vërtetë pasi këtë projekt nuk e përkrahin qeveritë aktuale”, vazhdon Odile Perrot.

Mirëpo, edhe serbët kanë një veprim polemizues që e kanë përdorur gjatë këtij Botërori. Kur Kolarov shënoi ndaj Kostarikës, ai ngriti tre gishtërinjtë (të madhin, treguesin dhe të mesmin).

“Në themel, ky gjest paraqet Trininë e Shenjtë. Por kjo u bë shenjë e tubimeve dhe e nacionalizmit të qartë në vitet e ’90-ta. Por Kolarov e madje edhe Gjokoviq, që i ngrit tre gishtërinjtë kur fiton ndonjë turne, nuk e bëjnë në atë kuptim. Thjeshtë e bëjnë për të dërguar një mesazh përkatësie përkrahësve serbë që e kuptojnë atë menjëherë. Por kjo ndodhi ndaj Kostarikës dhe askush nuk u shqetësua për të”, thotë Loic Tregoures.

Politike apo jo, të menduara apo jo, këto gjeste janë pjesë e historisë së trazuar të Ballkanit për dekada të tëra. Si në rastin kur një flamur shqiptar, i lidhur për një droni, aterroi në fushën e blertë gjatë ndeshjes mes Serbisë e Shqipërisë tetorin e vitit 2014. Pasojat: përleshje të mëdha dhe ndërprerje e ndeshjes.

Mirëpo, ekspertët e intervistuar nga “20minutes” kanë deklaruar se tashmë gjithçka ka kaluar.

/Koha.net/

Comment

*