Basha i tha “qeveria de fakto ka vdekur”, Rama ia ktheu “keq e më keq do shkoni”

Fjala e Kryeministrit Edi Rama në seancën e sotme parlamentare:

O Selman i vëllait, kë të qaj më parë, ty a motrën tonë që u zu i njëjti hall.

As kam kë qaj, as kam si ju qaj, për hir të të vërtetës, përveçse duke ju thënë këtu në sy diçka që ua kam thënë edhe më parë e që natyrisht vlen të përsëritet për ata që na dëgjojnë: Kush i bën shqiptarët për budallenj në fund e ha! Mos vazhdoni t’i bëni shqiptarët për budallenj, se keq e më keq do shkoni dhe keq e më keq do paguani.

Kush kujton se e bën për budalla shqiptarin më të pashkollë gabon dhe në fund fare paguan. Keni gabuar më parë e keni gabuar edhe më vonë. Keq e më keq keni paguar.

Kjo derexhe është në fakt fatura që keni marrë nga shqiptarët, pasi i keni bërë për budallenj jo një herë, por herë pas here me radhë. Përsëri do paguani! Do paguani dhe më keq, me kamatëvonesë shumë të lartë për sjelljen, veprimet dhe fjalët e ulëta për Shqipërinë, për njerëzit, për drejtësinë.

Le të çirren, le të bërtasin, le të ulërijnë me emrin e Shqipërisë në gojë, por ta harrojnë se do ta bëjnë dot për budalla këtë popull. Mund të gjejnë dhe do të gjejnë sa të duan edhe tellall në kazanin e medias, kot e kanë. Ky popull e di mirë edhe kush janë edhe çfarë duan edhe kujt i tremben edhe çfarë duhet të mendojë për ta sigurisht.

Mua nuk më dhimbsen këta, s’kanë si të më dhimbsen, se sa më shumë ta hapin gropën me lopatat e llumit për këtë qeveri dhe këtë shumicë aq më thellë do t’i zhysë ky popull në atë gropë. Por s’mund të mos më dhimbset, në fakt urrejtja e tyre që po i fundos përditë në llumin e atyre lopatave si institucion i opozitës, urrejtja që i ka kthyer në vegla qorre të saj.

E vetmja këshillë që do t’ju jepja, – ikën, s’dëgjojnë, kujtojnë se mund të vazhdojnë ta marrin për budalla këtë popull, – është të mos vazhdojnë të na urrejnë, sepse sa më shumë të na urrejnë, aq më shumë do humbasin logjikën.​

Të nderuar bashkëqytetarë,

Që krimi, droga dhe e keqja kanë zaptuar Shqipërinë, treguesi më i mirë është puna e këtij Kuvendi. Ja ku jemi prapë, jo për të parën herë, duke u marrë me një tjetër kriminel. Kuvendi i Shqipërisë që pas ardhjes në pushtet të Edi Ramës është rasti i vetëm në historinë e botës, që është marrë më shumë me punët e kriminelëve brenda kësaj salle, sesa me punët e ekonomisë, shëndetësisë, mirëqenies së njerëzve.

Ja ku jemi, duke shpenzuar më shumë kohë për të larguar kriminelët që ti Edi Rama ke sjellë në radhët e kësaj qeverie dhe këtij parlamenti, sesa të punojmë për jetët e fëmijëve tuaj, për të hapur vende pune  dhe për t’i liruar lakun nga fyti njerëzve të thjeshtë. Kemi shpenzuar më shumë kohë për të ndalur dorën tënde grabitëse nga xhepat e njerëzve me tendera, me koncensione, me grabitje sesa për t’i ndihmuar njerëzit në nevojë.

Sot ky Kuvend ka vendosur një tjetër rekord të zi. Është hera e parë që Kuvendi hedh poshtë kërkesën e Prokurorisë për heqjen e imunitetit të një deputeti. 24 deputetëve rresht,  Kuvendi i Shqipërisë ju ka hequr imunitetin pa asnjë përjashtim nga viti 1994.  Ju është hequr politikanëve më të lartë të vendit, të majtë e të djathtë në pushtet dhe në opozitë. Ju është hequr nga shumica të majta, ju është hequr nga shumica të djathta, ju është hequr për akuza të rënda, për akuza më të lehta e madje edhe qesharake.

Por arsyeja për këtë qëndrim të pandryshuar të Kuvendit ka qenë e thjeshtë. Me të mirat dhe me të këqijat e tyre, të gjitha legjislaturat e mëparshme kanë respektuar parimin se pushtetet janë të ndara. Se i takon drejtësisë të vendosë për këdo. Detyra e Parlamentit është vetëm t’i hapë rrugë drejtësisë.

Deri më sot.

Sot ky Kuvend është kthyer në vulën e narkoshtetit Rama-Tahiri. Narkoshteti Rama-Tahiri ka dy standarde për drejtësinë: një për veten e tyre dhe një për njerëzit e thjeshtë. Narkotrafikantët dhe narkopolitikanët janë të paprekshëm.

Dy vjet më parë, para një pallati të rrënuar në Fier, ia behën në orën 01:00 të natës, një varg me makina me xhama të errët të ardhur nga Tirana. Mbi 20 inspektorë dhe policë të Kontrollit të Brendshëm të Ministrisë të drejtuar nga Saimir Tahiri, hynë në një apartament të thjeshtë, në tre dhoma ku jetonin 7 shpirtra në një gjendje pothuajse të mjeruar. Ata kontrolluan shtëpinë pa asnjë dokument dhe pa asnjë lloj urdhri kontrolli, dhe pastaj morën një burrë zvarrë dhe e futën në makinë pa i thënë asgjë.

Emri i burrit është Dritan Zagani. Pasi e sollën në Tiranë, gjithë natën, e mbajtën të tre ditë të mbyllur pa të drejtë avokati dhe më në fund e çuan para Gjykatës ku më në fund mësoi akuzën “shpërdorim detyre”. “Shpërdorim detyre”, pa asnjë fakt, pa asnjë informacion kriminal. “Shpërdorim detyre” sepse ndau me partnerët informacionin se anti-droga e Fierit ishte vënë në dispozicion të bandave kriminale që kontrolloheshin dhe komunikonin me Saimir Tahirin dhe me Edi Ramën.

Sot Zagani fatmirësisht ndodhet në Zvicër në strehim politik për shkak të persekutimit politik nga narko-shteti Rama-Tahiri.

Kjo është drejtësia që Sajmir Tahiri dhe Edi Rama u ka dhënë shqiptarëve. Njerëzit e ndershëm, njerëzit e varfër janë rrëmbyer në kundërshtim me ligjin dhe për akuza qesharake.

22 vjeçari Estref Halili nga Kolonja e Lushnjes u arrestua dhe u çua në vetëvrasje për një cigare hashash. Për Tahirin, që është kapur në përgjimet e antimafias me tonelata hashash ju nuk shihni prova.

Melita Çenga, infermiere nga Shkodra, Brunilda Meka nga Korça u hoqën nga puna dhe shkuan drejt vetëvrasjes se nuk mbanin dot familjen. Ju mbroni Tahirin që merrte 30 mijë Euro për ngarkesë.

Resmije Alla 35 vjeç humbi jetën sepse donte që fëmija e saj azmatik të kishte dritë dhe mundësi për pompën e frymës që ti ia ndërpreve se nuk kishte mundësi të paguante. Tahiri merr 9 mijë Euro byzylykë, 15 mijë Euro diamante nga trafikantët dhe ti thua “s’ka prova”.

12 kryefamiljarë në një vit të vetëvrarë sepse nuk paguanin dot energjinë elektrike, dhe 5 milionë Euro në muaj nga kryetrafikanti Ministri yt i Brendshëm, po ti nuk ke prova.

Qamil Zela, i burgosur, i vetëvarur për një borxh prej 3 mijë e 200 lekësh ndaj Operatorit të Shpërndarjes së Energjisë që e ke vënë në funksion të bandave të Durrësit, por Sajmir Tahirit i duheshin të paktën 20 milionë Euro për fushatë.

Arif Doda, Klajdi Muça, Llazar Nasi, Gjovalin Gjini, e dhjetëra të tjerë, i ke çuar ti drejt vetëvrasjes për faturën e energjisë, por për Ministrin tënd të Brendshëm me targë AA003GB që bënte trafik droge ti nuk ke prova.

Ky është shteti yt mafioz që burgos dhe dhunon të varfërit dhe mbron e u bëhet mburojë kriminelëve dhe trafikantëve.

Ka dhe një të vërtetë tjetër.

Mbrëmjen e ditës kur deputetët socialistë të Këshillit të Mandateve vendosën për të mos i hequr imunitetin Sajmir Tahirit, dy miq të mi të huaj, darkonin në një nga lokalet më luksoze të Tiranës. Për çudinë e tyre, por jo timen, dy tavolinat e vetme të zëna në restorant kishin në tryezë deputetë socialistë.

Në njërën një deputet socialist, në një shoqëri të hareshme, me puro të rralla kubane dhe konjak të zgjedhur. Në tjetrën një ish-ministër i yti darkonte me verë që kushtonte më shtrenjtë se rroga minimale në Shqipëri. Dy deputetë, pothuajse tërë jetën rrogëtarë të shtetit, në jetën e tyre nuk e kishin parë këtë lluks, por që sot jetojnë si sheikë mes vendit më të varfër të Europës.

Kjo është e vërteta tjetër e votës suaj sot.

Nuk ishte votë për të mbrojtur krimet e Tahirit, por ishte votë për të mbrojtur tenderat e vjedhura, koncesionet klienteliste, pasuritë publike të tjetërsuara. Për të mbrojtur të paktën gjysmën e meshkujve në kabinetin tënd, të xhiruar dhe të përgjuar nga partnerët, siç t’i kanë dhënë ty provat, si lidhje të drejtpërdrejta të bandave kriminale të drogës dhe trafikut të armëve.

Sot me këtë votë keni mbrojtur veten tuaj. Sot me këtë votë, i keni vënë gozhdën e fundit një familje politike dhe ideologjike, që sot e keni kthyer në një familje kriminale, trëndafilin e të cilës e keni zëvendësuar me lulen e hashashit.

Vota e sotme është edhe kundër socialistëve të thjeshtë. Vota e sotme është votë dëshpërimi, paniku, për ty Edi Rama dhe për këdo tjetër, këtu në këtë sallë që nuk u çlirua dot nga interesat e ngushta personale dhe frikës së dosjeve që do të hapen.

Por, historia tregon se kur regjimet fillojnë të bien, skërmisin dhëmbët. Dhe e sotmja e tillë është, skërmitje dhëmbësh.

Kjo qeveri ka rënë! Është de facto e vdekur! Dhe orët e narkoshtetit kanë filluar të trokasin mbrapsht.

###

Kryetari i PD-se, Lulzim Basha e quajti votën kundër arrestimit të Saimir Tahirit si votë për mbrojtjen e maxhorancës e cila i vuri Kuvendit “vulën e narkoshtetit Rama-Tahiri”

“Kjo qeveri ka rënë, defakto dhe është e vdekur dhe orët e narkoshtetit kanë filluar të trokasin mbrapsht. Sot me këtë votë mbrojtët veten tuaj, keni ndërruar trëndafilin me lulen e hashashit” tha Basha nga foltorja e Kuvendit para se PD të largohej nga seanca parlamentare.

Ndërkohë në foltore doli kryeministri Rama i cili e nisi me batutë fjalën e tij dhe më pas duke iu drejtuar PD dhe LSI-se i tha:  Mos vazhdoni të na urreni se sa më shumë të na urreni sq më shumë do humbisni logjikën

“O  Selman i vllait kë të qaj më parë, ty a motrën tonë që ju zuri i njëjti hall. As kam kë qaj as kam si ju qaj veçse duke ju thënë në sy atë që e kam thënë më parë:  Kush i bën shqiptarët për budallenj, në fund e ha. Mos vazhdoni ti bëni shqiptarët për budallenj se keq e më keq do shkoni dhe keq e më keq do paguani. Kush kujton se e bën për budalla shqiptarin më të pashkollë gabon. Dhe në fund fare paguan. Keni gabuar më parë e keni gabuar edhe më vonë.

Keq e më keq keni gabuar dhe kjo është në fakt fatura që keni marrë nga shqiptarët pasi i keni bërë për budallenj jo një herë, por herë pas here me rradhë. Prap do paguani dhe do paguani më keq, me kamatë vonese shumë të lartë për sjelljen, veprimet dhe fjalët e ulëta për Shqipërinë, njerëzit dhe drejtësinë. Le të cirren, le të bërtasin, ulërijnë me emrin e Shqipërisë në gojë por ta harrojnë se do ta bëjnë dot për budalla këtë popull.

Mund të gjejnë dhe do gjejnë sa të duan, edhe tellall në kazanin e medias, kot e kanë. Ky popull e di mirë, edhe kush janë, edhe cfarë duan, edhe kujt i tremben, edhe cfarë duhet të mendojnë për ta sigurisht.

Mua nuk më dhimbsen këta, s’kanë si më dhimbsen se sa më shumë ta hapin gropën me lopatën e llumit për këtë qeveri dhe këtë shumicë, aq më thellë do ti zhysë ky popull në atë gropë. Por s’mund të mos më dhimbset urrejtja e atyre që po i fundos përditë në llumin e atyre lopatave si institucion i opozitës.

Urrejtja që i ka kthyer në vegla qorre të saj dhe e vetmja këshillë që do t’ju jepja ikën, s’dëgjojnë, kujtojnë se mund ta marrin për budalla këtë popull është të vazhdojnë të na urrejnë sepse sa më shumë të na urrejnë, aq më shumë do humbasin logjikën.

Ndërkohë Flamur Noka tha se parlamenti demonstroi se është parlamenti i turpit dhe i drogës dhe foli për revolucion popullor.

“Revolucion popullor për ta shkulur dhe shporrur këtë organizatë kriminale” tha Noka nga foltorja.

/Oranews.tv/

Comment

*