Drançolli publikon një letër të rrallë, të nënshkruar nga Skënderbeu

Prishtinë, 9 gusht 2019 – Historiani i shquar shqiptar, prof. Dr. Jahja Drançolli, e ka publikuar një letër të rrallë, të vjetër 568 vjet, të firmosur nga vetë dora e Gjergje Kastriotit – Skënderbeut.

Drançolli, në një postim në Facebook, ka dhënë edhe shpjegime për letrën të cilën Skënderbeu ia dërgonte Bujarisë së Republikës së Sienës në Itali.

Postimi i plotë:

568 vjetë më parë (8 gusht 1451): Letër e rrallë autografe e Skënderbeut dërguar Bujarisë së Republikës së Sienës në Itali…!

Letra autografe në fjalë është e njohur për njërën ndër 10 letra autografe (të nënshkruara) nga vetë dora e Skënderbeut, që ruhën në arkiva të njohura të botës (Romë, Venedik, Milano, Napoli, Paris, Dubrovnik, Zagreb dhe Beograd). Kjo letër autografe e shkruar sipas shkrimit humanistik të kohës në latinisht dhe italisht, është një fragment i shkurtër i shkëputur nga një histori madhore.

Ky dokument i çmueshëm i dërguar nga Lazri, abat i Arbrit, është shkruar në një kartë të rëndomtë bombagine të kohës, dhe siç shihet nga faksimili, në të dy anët e fletës (folio) ruhën shënjat e vulës (sigillum) të Skënderbeut, që mban datën, 8 gusht 1451, ndërsa Bujarisë së Republikës së Sienës u kishte ra në duar më 13 shtator 1451…!

Burimi: Archivio di Stato di Siena.

(r.m.)

 

Comment

*