Kolosi i gjuhës akademik Idriz Ajeti pret bashkëvendësit nga Shoqata Humanitare “Medvegja”

Në 100-vjetorin e lindjes, Shoqata Humanitare “Medvegja”, me seli në Fully të Zvicrës, në krye me Zenel Nezirin, kryetar, i bëri një vizitë Akademik Idriz Ajetit, me ç’rast atij iu dorëzua mirënjohja me motivacion “Personalitet i Shekullit”, e ndarë ditë më parë në manifestimin tradicional “Ditët e Diasporës”, të mbajtur në Banjë të Siarinës

Jonuz Fetahu

Bashkëvendësit mërgimtarë, të tubuar rreth Shoqatës Humanitare “Medvegja”, me seli në Fully të Zvicrës, tanimë disa vite me radhë e sponsorizojnë manifestimin tradicional “Ditët e Diasporës”, i cili mbahet në Banjë të Siarinës.

Ky manifestim u organizua edhe këtë vit, dhe këtë ditë Banja e Siarinës e përjetoi një ditë të veçantë: ajo ishte e mbushur me shqiptarë, shumica mërgimtarë, ndërsa ngjasonte në ato vitet e paraluftës së Kosovës, kur aty flitej pothuajse vetëm shqip.

Atë mbrëmje u mbajtën fjalime, pati këngë e valle, pati lot malli e mallëngjimi, por pati edhe nostalgji dhe revokim kujtimesh për vendlindjen e secilit prej të pranishmëve. Mbi të gjitha, këtë ndjenjë e shprushi aktori i mirënjohur i skenës dhe teatrit, Çun Lajçi.

Përveç tjerash, Shoqata Humanitare “Medvegja” me këtë rast dekoroi me mirënjohje individë dhe subjekte të ndryshme, në shenjë angazhimi dhe përkrahjeje të aktiviteteve humanitare që i zhvillon kjo shoqatë, ndër të cilët edhe Akademik Idriz Ajetin, me motivacion “Personalitet i Shekullit”, mirënjohje të cilën pak ditë më vonë Kryesia e kësaj shoqate, përkatësisht kryetari Zenel Neziri dhe anëtari Zenjullah Namani e morën mundin që atë t’ia dorëzojnë në dorë akademikut Ajeti në banesën e tij, në Prishtinë.

Kolosi i gjuhës shqipe stoik dhe i urtë

Në banesën e tij në Prishtinë, në rrugën “Agim Ramadani”, kolosi i gjuhës, Akademik Idriz Ajeti i pret bashkëvendësit e tij mërgimtarë së bashku me bashkëshorten e tij, e shtyrë gjithashtu në moshë. Gjuhëtari i spikatur e respekton me xhelozi mikpritjen për njerëzit e vendlindjes së tij. Edhe pse i shtyrë në moshën njëshekullore, ai qëndron stoik dhe i pakërrusur sikur në vitet e tij më të mira.

Derisa bashkëshortja sjell pijet për “mysafirët”, Akademiku ngulit sytë me llupën e tij në rreshtat e monografisë për tri dekada punë të shoqatës humanitare. Dhe teksa kryetari Neziri rrëfen për aktivitetet në fushën humanitare, atij sikur i bëhet zemra mal, gjë që reflektohet në buzëqeshjen engjëllore.

“Personalitet i Shekullit”, mirënjohje për njeriun 100-vjeçar

Në murin e dhomës ku bashkëbisedojmë rri e varur një orë me mbishkrimin “Akademikut Idriz Ajeti për 90-vjetorin e datëlindjes – Nga SHPH ‘Medvegja’, Zvicër”. Ajo tanimë e ka bërë një dekadë të plotë që rri e varur aty dhe sikur nuk do t’ia dijë që Akademiku tani e ka mbushur plot një shekull jetë.

Dhe kryetari Neziri e anëtari Namani e pyesin me humor sesi Akademiku e ka ndalur kohën dhe sikur nuk do të dëgjojë për 100 vjetët që i mbart mbi supe, ndërkaq si përgjigje ai buzëqesh lehtë.

“Idrizi ha ushqim në mënyrë të rregullt dhe me masë. Çdo racion e shoqëron me mjaltë natyrale. Fle dhe pushon me orar. Është i urtë dhe shumë i sjellshëm. Një engjëll i vërtetë”, rrëfen bashkëshortja, teksa i rri afër dhe i gjendet pranë në çdo sekondë të çmuar të jetës së Akademikut.

Kur e kupton se shoqata e ka nderuar me një mirënjohje edhe për datëlindjen e tij të 100-të, me motivacion “Personalitet i Shekullit”, ai ngrihet në këmbë sikur të jetë në moshën më të mirë të djalërisë së tij. Nuk ka dyshim se këtë e çmon si njërën ndër dhuratat më të çmuara. Këtë e shpreh edhe në gatishmërinë e tij që të shkrepë aparati sa herë që “mysafirët” duan ta bëjnë këtë. Dhe kjo e shkrepur është kujtim me vlerë të artë.

Mal librash gjithandej

Ndërsa bisedojmë dhe shprehim mendime për fatin e vendlindjes sonë, e cila fatkeqësisht është e braktisur pas luftës në Kosovë, vëmendja përqendrohet të librat e shumtë, me të cilat Akademiku e ka mbushur çdo kënd të banesës së tij. Ato janë stolia më e bukur e gjithë atij ambienti. Dhe, Profesori kërruset e i merr ato pa vështirësi. Madje edhe i shfleton e i lexon. Edhe pse është 100-vjeçar.

Në ndarje, Akademiku na falënderon shumë për këtë vizitë, ndërkaq ne e urojmë që ta gjejmë kështu të fortë edhe shumë vite në vazhdim. Ai është mburrje dhe krenari shqiptare, ndërsa emblemë dhe simbol i veçantë i Anamedvegjës, për ç’gjë e dekoroi edhe Shoqata Humanitare “Medvegja”, me seli në Fully të Zvicrës.

2 Responses to “Kolosi i gjuhës akademik Idriz Ajeti pret bashkëvendësit nga Shoqata Humanitare “Medvegja””

Read below or add a comment...

  1. sali ramadani-uskana says:

    AKADEMEKU MBETET I PERJETESHEM !

    Pas me shume takimeve te kahmotshme,qe nga Prishtina,Shkupi etj,ketu sebashku edhe shokun tim-vella,parakohe te ndjere,Sehat Markun,sidomos i biri ne moshen te re djaloshare,per ish-Kryetarin e Akademise se Shkencave dhe Arteve te Kosoves,Akad.Prof.Dr.,Idriz Ajetin,mbi te gjitha,me mujtohet nje mencuri e tij e madhe dhe historike,duke ndikuar si intelektual dhe Heroi i Vertete per zgjidhjen e nje problemi te rende, i cili mund te kishte edhe pasoja katastrofike te permasave me te medha kombetare,ne nje “kacafytje” me te tjetre,dhe Adak.Pror.Dr.Hasan Kaleshin (sic?!)
    Me Akad.Prof.Dr Martk Krasniqin,per te cilin,pata shkruar dhe botuar ne me shume media me dhjetra faqe te ngjajshme,”u bedatuam”me nje rast do te ia tejkalojne Akad.Prof.Dr.Idriz Ajetit,por ky i fundit,qe na qe,”na tradhtoimdhe nuk e “mjati” fjalen,por mire beri dhe,si i amshueshem KURRE,e pershendes ngroftesisht dhe sinqertisht,si mikun tim te vjeter dhe te pandare KURRE !

    Vetem nje fjale: Rrernofsh,sa malet dhe me pergezimet me te mira:t!
    I Juaji per dhe pas jetes:

    SALI RAMADANI-USKANA

    (ish-Kercova e…)

  2. Adnan Derti says:

    Baba im ka qane nxenes i Prof. Ajetit ne 51-52 ne Prishtine. E pershendesim nga Bostoni.

Comment

*