Liria e fesë, çështje e rëndësishme e politikës së jashtme amerikane

Frank Shkreli

27 Tetori shënon Ditën Ndërkombëtare të Lirisë Fetare për vitin 2020. Ka mbetur vetëm një javë deri në zgjedhjet presidenciale të 3 nëntorit 2020 në Shtetet e Bashkuara, ndërkohë që vlen të theksohet se avancimi i lirive në përgjithësi dhe në veçanti i lirisë fetare, në nivel ndërkombëtar, duhet të jetë një prioritet mb partiak.  Administrata e ardhshme, ciladoqoftë ajo, duhet të vazhdojë t’i japë përparësi lirisë fetare anembanë botës. Status-quo-ja për shumë komunitete fetare të pambrojtura, në gjithë botën, është një krizë që nuk duhet të tolerohet, thekson në një deklaratë me rastin e Ditës Ndërkombëtare, Instituti (Amerikan) për Lirinë e Fesë.

Historikisht, megjithëse me disa ndryshime në politikën e tyre, përfshirë sukseset dhe dështimet në mbrojtje të lirisë së fesë gjatë viteve e dekadave, administratat amerikane e kanë mbrojtur dhe e kanë avancuar lirinë e fesë, si pjesë të pandarë të politikës së jashtme amerikane.

Edhe Administrata aktuale, nëpërmjet një deklarate të Sekretarit Amerikan të Shtetit, Michael Pompeo, premtoi se liria e fesë “do të mbetet gjithmonë një përparësi thelbësore e politikës së jashtme të SHBA”.

“Njëzet e dy vjet më parë si sot, Shtetet e Bashkuara e miratuan Aktin Ndërkombëtar të Lirisë Fetare të vitit 1998”, tha Kryediplomati amerikan, në deklaratën e tij me këtë rast.

“Duke ripohuar angazhimin tonë për të promovuar dhe mbrojtur të drejtën themelore të lirisë fetare për të gjithë njerëzit, kudo që ndodhen. Si pikënisje nga vizioni i themeluesve të Amerikës, qeveria jonë e kuptoi që një individ, pavarësisht nga feja apo bindjet e tij, duhet të jetë i lirë të organizojë jetën e tij, në përputhje me ndërgjegjen e tij.  Liria fetare dhe temat e tjera të dinjitetit njerëzor janë – dhe do të mbesin gjithmonë – një përparësi thelbësore e politikës së jashtme të SHBA-ve”, tha z. Pompeo.

Në deklaratën e tij, z. Pompeo përmend shkeljet aktuale të lirisë fetare në botë, duke venë në dukje tri vendet dhunuese më të egra të lirisë fetare në botë, Kinën, Iranin dhe Korenë e Veriut, duke e veçuar Kinën si dhunuesen më të egër të lirisë fetare.  Z. Pompeo tha se Kina “ka kërkuar të zhdukë të gjitha format fetare si edhe besimet që nuk përputhen me doktrinën e Partisë Komuniste Kineze”.

Lëvizja globale për lirinë fetare është tani një realitet, përfundon Z. Pompeo.

“Një realitet plot diversitete rajonale, kulturore dhe politike – duke dëshmuar kështu një të vërtetë universale, pa mëdyshje, se çdo person, kudo, ka të drejtë të besojë ose të mos besojë, të ndryshojë bindjet e besimit të tij, të deklarojë fenë e tij dhe ta përhapë atë ndër të tjerë.  Në këtë Ditë Ndërkombëtare të Lirisë Fetare, Shtetet e Bashkuara janë krenare që promovojnë dhe mbrojnë lirinë fetare kudo, shkruan në deklaratën e tij kushtuar Ditës Ndërkombëtare të Lirisë Fetare 2020“, tha kryediplomati amerikan, Michael Pompeo.

Ndërsa në një deklaratë për median, Administratori në Detyrë i USAID-it, z. John Barsan tha se “Qeveria e SHBA ka caktuar 27 Tetorin si Ditë Ndërkombëtare të Lirisë Fetare në përkujtim të nënshkrimit historik të Aktit Ndërkombëtar të Lirisë Fetare (IRFA), në vitin 1998. Mbrojtja dhe promovimi i kësaj lirie themelore, në gjithë botën, ka qenë parimi kryesor i diplomacisë amerikane dhe ndihmesës së jashtme, që prej atij viti.”

Drejtori në Detyrë i USAID-t tha se megjithëse është shënuar përparim, mbetet shumë për t’u bërë në këtë fushë, pasi në dhjetë vjetët e fundit janë shënuar shkelje të rënda të lirisë fetare në një numër vendesh të botës dhe pothuaj kundër të gjitha feve, pa dallim.

“Si përfundim, Presidenti Trump dhe Zëvendës presidenti Pence e kanë bërë përparimin dhe mbrojtjen e lirisë fetare në gjithë botën, një përparësi të politikës së jashtme Amerikane.  Kjo është me të vërtetë liria e parë e Amerikës dhe USAID është krenare që luan një rol jetësor në ruajtjen e saj në të gjithë botën”, ka përfunduar z. John Barsa.

Mbrojtja e lirisë  fetare në botë është mbrojtur gjithmonë nga Shtetet e Bashkuara, por është theksuar më shumë sidomos që nga viti 1998 kur Presidenti demokrat Bill Klinton e nënshkroi ligjin “International Religious Freedom Act” (IRFA). Mbrojtjen e lirisë fetare në politikën e jashtme e vazhdoi edhe Presidenti republikan Xhorxh W. Bush, duke u përqendruar në qeveritë që E dhunonin këtë të drejtë dhe duke marrë masa për të përmirësuar gjendjen e lirisë fetare në ato vende. Edhe Presidenti demokrat Barak Obama I nënshkroi disa dispozita diplomatike për të bërë më të fortë ligjin e vitit 1998, të nënshkruar nga Presidenti Klinton.

Ndërkaq, Administrata Trump qershorin që kaloi nënshkroi nJë urdhër ekzekutiv për avancimin e Lirisë Fetare në nivel Ndërkombëtar, në të cilën thuhej se “Liria fetare për të gjithë popujt anembanë botës është një përparësi e politikës së jashtme të Shteteve të Bashkuara dhe Shtetet e Bashkuara do të respektojnë dhe do të promovojnë lirinë fetare, me të gjitha mjetet që kanë në dispozicion.”

Në Ditën Ndërkombëtare të Lirisë Fetare 2020, Instituti Amerikan për Lirinë e Fesë e mbështet promovimin e lirisë fetare nga administratat republikane dhe demokrate, tashti dhe në të ardhmen, duke thënë se “Liria fetare në nivel ndërkombëtar duhet të jetë një përparësi për të dy partitë kryesore politike amerikane, jo vetëm për mbrojtjen e një numri të caktuar njerëzish që pësojnë persekutimin fetar sot, por edhe për stabilitetin e atyre shoqërive ku po ndodhin persekutimet, pasi promovimi i lirisë  fetare është gjithashtu edhe në favor të sigurisë kombëtare të SHBA-ve“.

Comment

*