Manastirliu: Klubet e natës janë vatra infeksioni, forcë ligji për mbrojtjen e shëndetit

“Jemi duke u përgatitur për periudhën e vjeshtë- dimër për menaxhimin e situatës në rast të rritjes së të prekurve nga COVID19”, – tha deputetëve ministrja e Shëndetësisë dhe Mbrojtjes Sociale, Ogerta Manastirliu
Knid Ndrenika

Shqipëria paralajmëroi periudhë të vështirë me Koronavirusin në vjeshtë-dimër të vitit 2020.

Ministrja e Shëndetësisë, Ogerta Manastirliu tha se nëse nuk zbatohen masat parandaluese, do të ketë rritje të infeksionit si dhe hapje të dy spitaleve, përkatësisht 3 dhe 4 për COVID-19.

Deri tani kanë humbur jetën 148 persona nga Koronavirusi në Shqipëri.

Ministirja e Shëndetësisë, Ogerta Manastirliu paralajmëroi Shqipërinë se e pret një periudhë e vështirë e Koronavirusit në vjeshtë-dimër 2020.

Ministrja u tha deputetëve se pavarësisht pritshmërisë për shtim të infeksionit, vijojnë përgatitjet për ta përballuar COVID-19-ën.

Përpara publikimit të raportit të 24 orëve të fundit, në Shqipëri numërohen 148 viktima nga Koronavirusit me moshë mesatare rreth 66-vjeçare dhe me të paktën 10 për qind pa asnjë sëmundje tjetër bashkëshoqëruese.

Zonja Manastirliu shprehu vendosmërinë e qeverisë për të forcuar me Akt Normativ masat kundër Koronavirusit:

“Çfarë na pret gjatë gushtit, shtatorit, tetorit, vjeshtës dhe dimrit, nëse kemi një neglizhim të zbatimit të masave, të parapërgatitemi për rritje të infeksionit, hapje të spitaleve “COVID-3” dhe “COVID-4”. Vendosja e maskave me ligj është masë parandaluese”.

Masat përfshijnë mbylljen pas orës 20 të bareve, restoranteve, pabeve, diskove, klubeve me muzikë dhe çdo shërbimi të ngjashëm.

Kuvendi, pasi foli ministrja Manastirliu, miratoi Aktin Normativ për masa të veçanta administrative gjatë kohëzgjatjes së pandemisë me 87 vota për, 11 kundër dhe 2 abstenim.

###

Duke prezantuar ndryshimet në Aktin Normativ për klubet e natës dhe penalitetet e tyre, Ministrja e Shëndetësisë dhe Mbrojet Sociale Ogerta Manastirliu, ka deklaruar se klubet e natës u kthyen në vatra të përhapjes së infeksionit dhe se do të ndërmerret cdo masë që do të vlerësohet e nevojshme për ruajtjen e shëndetit të qytetarëve.

“Vendosja e penaliteteve të shtuara për klubet e natës, diskove apo çdo lloj shërbimi të kësaj natyre të cilat kanë patur detyrimin në fakt që në krye të herës për të mos u hapur, është një masë që ndërmerret për mbrojtjen e shëndetit të qytetarëve.
Sepse ato janë kthyer në vatra potenciale infeksioni. Të rinjtë po bëhen vektorë të shpërndarjes së infeksionit tek moshat e tjera, tek prindërit dhe tek të moshuarit apo tek ata më të dobëtit.
Detyrimi që vendoset tani nëpërmjet këtij Akti Normativ, jo vetëm përcakton rritje të masës së penalitetit por gjithashtu vlerëson një pezullim për një periudhë 1-vjeçare në rastet kur këto subjekte nuk i binden këtij ligji”, tha Manastirliu.
Duke vlerësuar se vendosja dhe miratimi i këtij akti normativ vjen padyshim në kohën e duhur për të forcuar instrumentat ligjore në funksion të zbatimit të masave anti-Covid, Manastirliu tha se po përgatitet plani I masave për vjeshtë-dimrin, në rast të rritjes së numrit të rasteve.
 “Ne po marrim masa parandaluese dhe ky akt normative vjen pikërisht në vijim të masave parandaluese.
Por ndërkohë jemi duke u përgatitur për periudhën e vjeshtës dhe për periudhën e dimrit për të menaxhuar situatën, pasi, nëse do të kemi një neglizhim të zbatimit të masave, duhet të parapërgatitemi për një rritje të infeksionit të Covid19.
Jemi duke punuar për të fuqizuar akoma më shumë skuadrat lëvizëse tek Urgjenca Kombëtare, në funksion edhe të dhënies së shërbimit në banesë për qytetarët që kanë nevojë apo pë ata të cilët do të kenë nevojë në të ardhmen.
Po fuqizojmë kapacitetet tona spitalore universitare edhe ato rajonale. Gjithashtu jemi duke përgatitur skuadrat e rezervës për hapjen e spitaleve Covid 3 dhe Covid4. Ndërkohë që vijojmë të rrisim kapacitetet e testimit”, tha Manastirliu.
Duke vlerësuar se cdo masë shtrënguese nuk është e lehtë, Ministrja e Shëndetësisë deklaroi se do të merret cdo masë e nevojshme për të ruajtur dhe për t’u kujdesur për shëndetin publik.
Me ndryshmet në Aktin Normativ, mosrespektimi i detyrimit të mbylljes së klubeve të natës, diskove apo shërbimeve të kësaj natyre, dënohet me gjobë 3 000 000 lekë dhe me pezullim të aktivitetit për një periudhë një vjeçare.
Ndërsa mosrespektimi i detyrimit për ndalimin e muzikës pas orës 20:00 në shërbimet e cdo lloji, dënohet me gjobë 1 000 000 lekë dhe në rast përsëritje, me pezullim te aktivitetit për një periudhë gjashtë mujore.

Comment

*