Në Kosovë, shkon në 86 numri i të prekurve me COVID-19

Prishtinë, 26 mars 2020 – Instituti Kombëtar i Shëndetësisë Publike të Kosovës (IKSHPK) bëri të ditur se në orët e mbrëmjes të ditës së enjte janë konfirmuar edhe shtatë raste të reja të të infektuarve me virusin COVID-19.

Në njoftim thuhet se të shtatë rastet e reja janë nga komuna e Malishevës dhe se të gjitha kanë qenë të njohura e të kontaktuara më pare dhe kanë qenë në vetëizolim

Më herët gjatë ditës ky institut konfirmoi 8 raste të tjera të të prekurve me virusin COVID-19: 4 në fshatin Studime e Ulët të komunës së Vushtrrisë, 3 në Prishtinë dhe 1 në fshatin Llugagji të komunës së Pejës.

Deri më tani në Kosovë janë konfirmuar gjithsej 86 raste të infektimit me koronavirusin e ri.

IKSHPK ngre alarmin se në Prishtinë po vërehen dalje masive në orët e lira të lëvizjes gjë që përbën rrezik për përhapje massive të epidemisë.

“Ju lutemi t’u përmbaheni rekomandimeve të Institutit Kombëtar dhe mos dilni në grumbuj gjatë orëve të lira të lëvizjes sepse jeni duke rrezikuar veten dhe familjet Tuaja”, theksohet në komunikatën e IKSHPK.

 

Komunikata e plotë e IKSHPK:

 

THIRJE QYTETARËVE: JU LUTEMI QËNDRONI NË SHTËPI!

Sonte më 26.03.2020 në Laboratorin e Mikrobiologjisë Molekulare në IKSHPK me metodën RT-PCR, janë testuar edhe 25 mostra nga Malisheva prej të cilëve 7 rezultuan pozitive.

Të gjitha rastet janë të njohura, të kontaktuara dhe në vetëizolim.

Ekipet e IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke iu obliguar për vetëizolim dhe të kërkojnë ndihmë mjekësore nëse kanë simptome.

Ju lutemi ti përmbaheni rekomandimeve të Institutit Kombëtar dhe mos dilni në grumbuj gjatë orëve të lira të lëvizjes sepse jeni duke rrezikuar veten dhe familjet e Juaja!

Në Prishtinë po vërehen dalje masive në orët e lira të lëvizjes. Grumbuj të njerëzve që po rrezikojnë veten dhe të gjithëve! Ju lutem kini kujdes se mund të shkaktoni shpërthim epidemik në kryeqytet!

Shikoni ju lutem valën epidemike në shtetet e Europës, veni gishtin në kokë dhe mendoni. Mos pengoni ekipet e Institutit me pyetje të cilat i keni mësuar tashmë nga rekomandimet e Instituti Kombëtar dhe Ministrisë së Shëndetësisë. Na ndihmoni ta kryejmë punën sublime por mundohuni të zbatoni secili detyrën e juaj duke ruajtur shëndetin tuaj. Ju kemi lënë të pushoni dhe jo secili të marr detyrën e epidemiologut duke pyetur detaje, duke u munduar të rikonstruktojnë çdo vatër infeksioni, duke u zhytur në kurreshtjen e njohjes së çdo procedure të hulumtimit. Pushoni dhe vetëm pushoni që të na lini të punojmë!

Ju gjendeni në shtëpitë e juaja me familiar. Ne akoma gjendemi në punë pa orar nga 15-20 orë! Për ju! E ju për ne: JU LUTEMI QËNDRONI NË SHTËPI!

(r.m.)

Comment

*