Netanyahu: Populli i Izraelit dhe ai i Kosovës mund të arrijnë shumë bashkë

Prishtinë, 15 shtator 2020 – Kryeministri i Izraelit, Benjamin Netanyahu, i është drejtuar popullit të Kosovës me një letër me rastin e festës së Vitit të Ri hebraik.

Netanyahu ka thënë se zhvillimet e fundit mes Izraelit dhe Kosovës mund të jenë fillim i një epoke të re nga e cila do të përfitojnë popujt e dy vendeve. Ai ka thënë se ia zgjatë dorën e miqësisë popullit të Kosovës.

“Në këtë Vit të Ri, e zgjat dorën time të miqësisë për popullin e Kosovës. Zhvillimet e fundit mes Izraelit dhe Kosovës mund të jetë një fillim i një epoke të re nga e cila do të përfitojnë popujt e dy vendeve. Jam optimist se mund të arrijmë aq shumë duke punuar së bashku dhe është shpresa ime e sinqertë se do ta shohim këtë të realizohet. E vlerësoj thellësisht angazhimin e vazhdueshëm të komunitetit hebraik në Kosovë për të na bërë më afër”, thuhet në letër.

 

 

Presidenti i Kosovës Hashim Thaçi ka thënë se ceremonia e së martës është e veçantë meqë tani Kosova dhe Izraeli kanë krijuar marrëdhënie diplomatike.

“Këtë vit, kjo festë është edhe më e madhe sepse vjen me lajmin e shumëpritur për njohjen reciproke mes shtetit të Kosovës dhe Izraelit. Me këtë, miqësia jonë historike, tradicionale mes dy popujve tanë, po forcohet çdo ditë e më tepër. Ndërtohet urë e fuqishme e komunikimit dhe bashkëpunimit ndërinstitucional në sferat shoqërore, bashkëpunim nga i cili do të përfitojmë të gjithë. Do të përfitojë Kosova, Izraeli, Ballkani Perëndimor dhe i gjithë globi”, ka deklaruar Thaçi.

Ai ka theksuar se është e rëndësishme që njohja nga Izraeli ka rrjedhur nga Shtëpia e Bardhë.

Presidenti i Kosovës ka folur edhe për marrëveshjen e arritur në Shtetet e Bashkuara mes Kosovës dhe Serbisë.

Sipas tij, SHBA-ja mund të kryejë marrëveshje politike dhe stabilizim të marrëdhënieve e njohje reciproke midis Kosovës dhe Serbisë.

“Prandaj shënojmë edhe këtë manifestim, këtë ngjarje madhështore këtu në Prishtinë në një moment të veçantë dhe historik për të dyja vendet, veçanërisht kur ky vit i ri po shënohet pas arritjes së marrëveshjes së Uashingtonit, marrëveshje kjo që ka karakter ekonomik, të sigurisë por edhe të njohjes reciproke të shtetit të Kosovës dhe Izraelit. Ka karakter ekonomik sepse kemi më shumë rrugë e autostrada, hekurudha bashkëkohore e vija ajrore funksionale. Ka karakter të sigurisë sepse me partnerët do të jemi në luftë kundër terrorizmit dhe ekstremizmit. Do të kemi më tepër paqe. Dikur pakkush besonte se këto përpjekje mund të përfundonin me marrëveshje paqësore”, ka thënë mes tjerash ai.

Kryeministri i Kosovës, Avdullah Hoti, gjatë manifestimit të mbajtur ka thënë se ky Vit i Ri hebraik shënohet me njohjen reciproke mes dy vendeve.

“Më lejoni të uroj edhe unë vit të mbarë për të gjithë popullin izraelit. Është kënaqësi të festojmë së bashku vitin e ri hebraik. Uroj që gjatë ditëve festive të keni pasurim shpirtëror. Kësaj radhe viti i ri është i posaçëm është festë që shënon njohjen reciproke Kosovë-Izrael. Ne do të vendosim së shpejti marrëdhëniet tona miqësore me shtetin mik”, ka thënë Hoti.

Kryetarja e Kuvendit të Kosovës, Vjosa Osmani, po ashtu ka folur për lidhjen mes dy vendeve.

Ajo ka thënë se nuk ka në botë dy popuj që i kuptojnë më mirë vuajtjet e njëri tjetrit sesa ai izraelit dhe i Kosovës.

“Në frymën e kësaj feste uroj që besimi miqësia solidariteti të jenë udhërrëfyes për të gjithë ne. Për një kohë të gjatë por në veçanti 7 dekada më parë populli j Kosovës por të gjithë shqiptarët i qëndruan pranë popullit hebraik. Nuk ka dy popuj që i kuptojnë vuajtjet e njëri tjetrit me mirë se sa popujt e Kosovës dhe Izraelit”, ka thënë Osmani.

Kreu i Lëvizjes Vetëvendosje, Albin Kurti, ka thënë se njohja shtetërore mes Kosovës dhe Izraelit do të jetë hapi i parë i miqësisë mes popullit të Kosovës dhe atij të Izraelit.

“Më lejoni të ju shpreh urimet e mia dhe të subjektit që përfaqësoj për vitin e ri hebraik. Ne në këtë festë hebraike me gjithë zemër urojmë mbarësi për të gjithë. Njohja shtetërore mes Kosovës dhe Izraelit do të jetë hapi i parë i miqësisë mes popullit të Kosovës dhe atij të Izraelit E shkuara na mëson që të bashkëpunojmë për paqe”, ka thënë Kurti.

Përmes një videomesazhi i dërguari special i SHBA-së për dialogun Kosovë – Serbi, Richard Grenell, ka uruar vitin e ri hebraik. Ai ka përshëndetur njohjen mes dy vendeve, Kosovës e Izraelit.

(KOHA.net)

Comment

*