Presidenti Trump dhe Zonja e Parë fillojnë një vizitë në Britaninë e Madhe

Presidenti Donald Trump ndodhet në Britani për një vizitë që përfshin takim me familjen mbretërore, një darkë shtetërore dhe bisedime me kryeministren në largim Theresa May.

Mbretëresha Elizabeth e Britanisë përshëndeti presidentin Trump dhe gruan e tij Melania pasi mbërritën në Pallatin e Buckinghamit me helikopter të hënën. Pas një ceremonie mikpritëse që përfshinte 41 të shtëna topash, dhe inspektimin e Gardës Mbretërore të Nderit, presidenti Trump pati një drekë private me mbretëreshën.

Mbretëresha Elizabeth i shoqëroi presidentin dhe Zonjën e Parë në një vizitë në galerinë e fotografive të Pallatit Buckingham. Artifaktet në galeri përfshijnë një hartë të Nju Jorkut të shekullit të 18-të dhe statujën e një kali, që presidenti i dha Mbretëreshës Elizabet gjatë vizitës së tij vitin e kaluar.

Para largimit nga Uashingtoni, presidenti Trump tha se udhëtimi i tij do të ishte “shumë interesant” dhe se mendon se Shtetet e Bashkuara dhe Britania kanë mundësi të hartojnë një “marrëveshje shumë të madhe tregtare” në një të ardhme të afërt.

Vizita e tij vjen ndërsa Britania ndodhet në mes të trazirave politike. Kryeministrja May njoftoi muajin e kaluar se do të japë dorëheqjen më 7 qershor, dy ditë pas largimit të presidentit Trump, pasi nuk arriti të përfundonte daljen e Britanisë nga Bashkimi Europian.

Ky proces do të trashëgohet nga pasardhësi i saj, pa ndonjë rrugë të qartë për një zgjidhje ngas partitë thellësisht të ndara.

Trump ka mbështetur publikisht ish-Ministrin e Jashtëm Boris Johnson si udhëheqës të Partisë Konservatore për të pasuar zonjën May. Ai u tha gazetarëve para se të niset nga Shtëpia e Bardhë të dielën vonë se mund të takohet me zotin Johnson dhe politikanin e partisë Brexit Nigel Farage, në Londër, duke krijuar potencialisht telashe për kryeministren që po largohet.

Ajo që sigurisht nuk është në axhendën e tij është një takim me kryebashkiakun e Londrës, Sadiq Khan, i cili shkroi në gazetën The Observer se mikpritja e Trump-it për një vizitë shtetërore është “kundër vlerave britanike”. Ai përmendi ripublikimin në Twitter nga presidenti Trump të një videoje nga një “grup racist britanik i ekstremit të djathtë”, refuzimin e presidentit për provat shkencore të ndryshimeve klimatike dhe “përpjekjen për të ndërhyrë pa turp” në garën për të zëvendësuar kryeministren May.

Kur u pyetën nëse ai do të ishte i hapur për t’u takuar me kryebashkiakun Khan, Trump tha të djelën, “Jo, unë nuk mendoj shumë mirë për të” dhe e krahasoi atë me Kryetarin e Bashkisë së Nju Jorkut, Bill de Blasio, një kundërshtar politik, “vetëm se është më i shkurtër”, tha ai.

Pas mbërritjes në Londër, Trump vazhdoi sulmin ndaj Khanit përmes Twitterit, duke e quajtur atë një “humbës të ftohtë”, i cili “ka qenë i keq deri në budallallëk” ndaj vizitës së Presidentit të Shteteve të Bashkuara, aleati më i rëndësishëm i Mbretërisë së Bashkuar”.

Vizita e presidentit Trump do të përfshijë gjithashtu ceremonitë përkujtimore të Ditës së Fitores D-Day, në Britani dhe Francë dhe një ndalesë në Irlandë. (VOA)

Comment

*