Rama fton Bashën për zgjedhjen e PP të Përkohshëm dhe marrëveshje 6-mujore

Kryeministri Edi Rama publikoi në facebook ftesën për një marrëveshje të re me kryetarin demokrat opozitar Lulzim Basha

 Denion Ndrenika

Kryeministri Edi Rama i bëti thirrje kryetarit të Partisë Demokratike opozitare Lulzim Basha të zgjedhin bashkarisht një kryeprokuror të ri të përkohshëm.

Zoti Rama pret bashkëpunimin e opozitës për një emër kandidati për pasues të kryeprokurorit Adriatik Llalla.

Në profilin e tij në rrjetin fejsbuk, kryeministri arsyeton se bashkëpunimi me kryetarin Basha për Prokurorin e ri të Përgjithshëm të Përkohshëm nxjerr vendin dhe instituconet nga gjendja me kundërthënie interpretimi ligjor dhe hap rrugën për marrëdhënie të re qeveri-opozitë në të mirë të eurointegrimit.

Procedura ligjore për zëvëndësimin e kryeprokurotit Adriatik Llalla ka filluar në Kuvend.

Ulsi Manja nga Partia Socialiste, kryetar i Komisionit të Ligjeve të Kuvendit mbështet përcaktimin e fundit të mandatit të kryeprokurorit nga Sekretari i Përgjithshëm i Kuvendit dhe Shërbimi Mbikqyrës Institucional:

“Kësaj çështje i ka dhënë përgjigje dhe Kushtetuta dhe neni 109, pika 2 i ligjit “për Organizimin dhe Funksionimin e Prokurorisë në Republikën e Shqipërisë. Që do të thotë mandati i Prokurorit mbaron në datën 7 dhjetor 2017. Kuvendi i Shqipërisë do të ketë përgjigje për këtë situatë të krijuar”.

Problemi lidhet edhe me numrin e votave në Kuvend. Ose duhen 84 vota sipas dispozitës kalimtare të ligjit të Prokurorisë; ose me 36 vota, pra shumicë e thjeshtë në prani të 71 deputetëve në sallë për të hapur seancën kuvendare.

Oerd Bylykbashi deputet i Partisë Demokratike arsyeton me kushtet kur askush nuk e e ka kaluar rivlerësim/kontrollin e figurës së gjyqtarëve dhe prokurorëve, “Vetting”-un:

“Vendimi merret nga Kuvendi me 3/5 e votave, përfshirë faktin që asnjë kandidat nuk ka kaluar “Vetting”-un dhe kjo është një kërkesë themelore, mazhoranca kërkoi ta zgjedhë me 36 vota në Kuvend, përfshi edhe votën e Saimir Tahirit”.

Kushtetuta e ndryshuar për reformën në Drejtësi në 22 korrik 2016 thotë që prokurorin e ri e zgjedh Këshilli i Lartë i Prokurorisë, një organ që ende nuk është krijuar.

Shkrimi nga KM Edi Rama në facebook:

“A mund të kemi një zgjidhje të përbashkët për Prokurorin e Përgjithshëm, si pikënisje të një Pakti Kombëtar për Europën që duam?

Shqipëria është në vigjilje të një takimi me historinë, sepse në gjashtë muajt e ardhshëm do të vendoset nëse do t’i çelim dot apo jo negociatat për anëtarësim me Bashkimin Europian; nëse do të ngjisim një shkallë themelore vlerësimi nderkombëtar për vendin tonë, e për rrjedhojë edhe pjekurie të re në sjelljen politike ndaj atdheut tonë të përbashkët, apo nëse do ta humbasim këtë shans historik për t’u afruar më shumë se kurrë më parë me Bashkimin Europian; nëse do të punojmë të gjithë, së bashku, për ta fituar sfidën e çeljes së negociatave apo do ta humbasim edhe për fajin tonë, takimin me historinë…

Sepse po, jemi shumë afër kësaj mundësie të shumëpritur, siç e konfirmoi së fundmi me zë e me figurë përpara opinionit publik shqiptar e europian, edhe vetë Presidenti i Komisionit, Jean-Claude Juncker, deri dje i heshtur në raport me Shqipërinë. Por gjithashtu po, kemi ende shumë për të bërë, që distancën e shkurtuar tanimë maksimalisht, ta zerojmë në këta gjashtë muaj duke u përballur të bashkuar, centimetër për centimetër, deri me skeptikun më të fundit në rreshtin e gjatë të vendimmarrësve europianë. Dhe nëse këtë copë rruge deri në qershorin 2018, e bëjmë të ndarë si deri më sot, me qeverinë që flet në emër të vendit e me opozitën që bën politikë të brendshme kur flet me faktorët jashtë vendit, rrezikojmë që të ngatërrohemi me këmbët tona në centimetrat e fundit dhe pastaj, eh, pastaj të detyrohemi të presim kushedi sa kohë që të na riparaqitet mundësia historike.

Nuk dua të bëj asnjë gjyq publik të qëndrimit të derisotëm të opozitës, sepse nuk e kam gjëkundi qëllimin të tregoj këtu pse ne po bëjmë gjënë e duhur për vendin, teksa opozita po bën gjënë e gabuar duke e goditur vendin në gjuhë të huaj. Dua vetëm të arsyetoj ftesën publike për opozitën që,,të paktën në gjashtë muajt e ardhshëm, t’i vihemi në dispozicion së bashku përpjekjes për të siguruar çeljen e negociatave, duke bashkërenduar nismat e veprimet e nevojshme për ta çuar jo qeverinë, po Shqipërinë në fitoren e kësaj sfide të vështirë, por krejtësisht të mundur tanimë.

Momenti kur diskutohet për mandatin e Prokurorit të Përgjithshëm, është sipas meje momenti i duhur për të diskutuar, jo thjesht daljen nga situata e fundmandatit të prokurorit në detyrë dhe hyrjen në fazën e nje mandati te përkohshëm me një prokuror të përkohshëm, po nisjen e një faze të re bashkepunimi mes qeverisë e opozitës në vigjilje të vendimit për çeljen e negociatave të Shqipërisë me Bashkimin Europian. Unë i di mirë besoj pikat ku opozita ndahet me ne, po besoj e di mirë edhe cdo përfaqësues i opozitës qe ka lidhje me partnerët ndërkombëtarë, se ata nuk e aprovojnë ekspozimin në gjuhë të huaj të dasisë së egër të politikës tonë të brendshme. Dhe jo vetëm nuk e aprovojnë, por ka ndër ta që e përqeshin dhe e përdorin si argument, për ngurrimin e tyre të brendshmëm qe të aprovojnë çeljen e derës së negociatave për Shqipërinë.

Natyrisht opozitës nuk i kërkon kush qe të heshtë, aq më pak mund të më shkojë mua në mendje diçka e tillë. Çka unë i kërkoj opozitës është të konsiderojë pa humbur kohë ftesën që të ulemi në tryezë për çështjen aktuale të Prokurorit të Përgjithshëm dhe të bëjmë një Pakt Kombëtar për Europën që duam. Të thjeshtë, të qartë dhe serioz. Me disa hapa të përbashkët drejt çeljes së negociatave (dhe pse jo edhe përtej nëse ka mundësi në rrugën e arsyes), si shprehje e vullnetit të mirë për ta vënë Shqipërinë mbi partitë dhe axhendën e përbashkët kombëtare mbi axhendat e përveçme të politikës së ditës.

Kjo do të ishte rruga më e arsyeshme për të mos përdorur kartonat e shumicës së thjeshtë në çështjen e Prokurorit të Përgjithshëm dhe për të mos i lënë asgjë mangut përpjekjes për t’i çelur negociatat për anëtarësim. Të cilat kësisoj, do të ishin një fitore e madhe e vendit në arenën ndërkombëtare. Një fitore madhe e politikës ne tërësi dhe e asnjë pale në veçanti. Një fitore e madhe e të gjithë shqiptarëve pa dallim.”

Comment

*