Rama: Njohja e Kosovës mbetet e vetmja alternativë për Serbinë

Bruksel, 11 korrik 2018 – Kryeministri i Shqipërisë, Edi Rama, ka shfaqur shpresën se Beogradi dhe Prishtina do të gjejnë shpejt një zgjidhje përmes dialogut.

Rama ka shprehur opinionin e tij se njohja e Kosovës nga Serbia është “e vetmja alternativë për të për të lënë pas vështirësitë e të kaluarës së përgjakshme dhe konfliktuale”.

“… sipas këndvështrimit tim njohja e plotë mbetet e vetmja alternativë për të zgjidhur këtë çështje që ka zgjatur për një kohë të gjatë dhe e vetmja mënyrë për të lënë pas vështirësitë e të kaluarës së përgjakshme dhe konfliktuale”, është shprehur Rama, në një deklaratë për median serbe “Tanjug” pas Samitit të NATO-s në Bruksel.

Rama i ka vlerësuar Presidentit serb Aleksandar Vuçiq për, siç është shprehur, “përpjekjet e vështira për të vazhduar këtë proces dhe për të arritur një zgjidhje”.

Rama ka theksuar se Shqipëria është shumë e interesuar për të gjetur një zgjidhje mes Kosovës e Serbisë, por ka theksuar se Shqipëria nuk flet kurrë në emër të Kosovës.

“Shqipëria nuk flet kurrë në emër të Kosovës, por për Kosovën”, ka theksuar ai.

Deklarata e plotë e kryeministrit Rama, siç transmetohet nga Ora News.tv:

 

“Unë mendoj se çdo gjë është në dorë të dy presidentëve dhe të dy palëve. Sigurisht që Shqipëria është shumë e interesuar për të gjetur një zgjidhje dhe natyrisht që Shqipëria nuk flet kurrë në emër të Kosovës por për Kosovën dhe sërish unë e di që këndvështrimi ynë nuk është se është i kënaqshëm, kur dëgjohet nga Beogradi, por opinioni ynë mbetet opinioni ynë me njohje të plotë dhe një zgjidhje përfundimtare do të ishte më e mira për fëmijët në Serbi, në Kosovë dhe në Ballkan.

Unë shpresoj shumë se do të përfundojë së shpejti, unë i vlerësoj shumë përpjekjet e presidentit serb, Vuçiç, përpjekjet e vështira për të vazhduar këtë proces dhe për të arritur një zgjidhje dhe ndërkohë që të gjithë janë në dijeni se ne kemi pranuar për të mos rënë dakord për të, sepse sipas këndvështrimit tim njohja e plotë mbetet e vetmja alternativë për të zgjidhur këtë çështje që ka zgjatur për një kohë të gjatë dhe e vetmja mënyrë për të lënë pas vështirësitë e të kaluarës së përgjakshme dhe konfliktuale.

Nga këndvështrimi juaj në Beograd, Prishtina bën një hap para dhe dy hapa mbrapa. Edhe nga këndvështrimi i njerëzve në Prishtinë, Serbia bën një hap para dhe dy hapa mbrapa, gjë që tregon se dialogu nuk është i lehtë, sepse është një dialog i vërtetë dhe shumë i vështirë.

Kështu që unë mendoj se të gjitha këto që po ndodhin janë pjesë e rrugës ku asgjë nuk do të jetë e lehtë, por sërish shpreh besimin se atje ku ka vullnet do të ketë një zgjidhje dhe, në të njëjtën kohë, përsëris se unë e di që nuk është e lehtë për mikun tim, presidentin e Serbisë, por njëkohësisht unë e respektoj për përpjekjet e tij dhe gjithashtu e respektoj për faktin që ai e ka njohur atë përfundimisht, duke qenë se kjo është një çështje që nuk mund të qëndronte në këto kushte dhe se të vazhdohet në mënyrën e vjetër nuk do të çonte askënd në një horizont të ri.

Sërish, unë do të doja të inkurajoja të dyja palët për të vazhduar më tej dhe ne e mbështesim dialogun dhe jemi në dijeni që nuk është i lehtë dhe shpresoj shumë që serbët në Kosovë dhe shqiptarët në Kosovë do të kenë një jetë më të mirë më vonë”.

(r.m.)

Comment

*