Thaçi në Uashington: “Jam krenar që jam President i shtetit më pro-amerikan në botë”

Uashington, 8 shkurt 2018 – Presidenti i Republikës së Kosovës, Hashim Thaçi, mori mbrëmë pjesë në pritjen e organizuar nga Ambasada e Republikës së Kosovës në Uashington, për ndër të dhjetëvjetorit të pavarësisë së Kosovës, njofton kabineti i Presidentit.

Thaçi ka kujtuar ditën e shpalljes së pavarësisë së Kosovës, duke e cilësuar si ngjarje emocionuese.

“Unë u bëra Kryeministër disa muaj më parë dhe nuk flija gjithë natën, sepse po përgatitesha ta lexoja Deklaratën e Pavarësisë së Republikës së Kosovës. Isha gati të deklaroja atdheun tim si të lirë, demokratik dhe të pavarur. Ajo ditë nuk ishte një ditë e zakonshme”, ka thënë Thaçi.

Ai ka shtuar se si kurrë më parë, njerëzit në të gjithë vendin dhe shumë të tjerë që vinin nga e gjithë bota, mbushën rrugët dhe sheshet e ngushta të qytetit, duke shtuar tutje se shumica e tyre ishin të lumtur për kapitullin e ri dhe fillimin e ri, por shumë ishin të trishtuar, duke kujtuar sakrificën që dhamë për pavarësinë.

Thaçi ka kujtuar se mijëra njerëz vdiqën, dhjetëra mijëra gra që ishin përdhunuar, njerëz të panumërt humbën gjithçka për lirinë dhe pavarësinë tonë.

“Duke shkuar në ndërtesën e Kuvendit, po mendoja gjithashtu për babanë dhe nënën time, dhe shumë gjenerata të tjera që kishin jetuar nën aparteid, pa shkollim në gjuhën e tyre, pa tri elementet të cilat amerikanët i kishin cilësuar si më të rëndësishmet në Deklaratën Amerikane të Pavarësisë: lirinë, jetën dhe lumturinë”, ka theksuar ai.

Duke e cilësuar këtë moment si më të lumturin dhe më të rëndësishmin në jetën e tij, ai tha se “Ishte momenti më i lumtur dhe më i rëndësishëm i jetës sime. Ishte momenti më i lumtur për popullin tim dhe ishte një moment i veçantë për të gjithë miqtë e Kosovës. Ishte një udhëtim i vështirë dhe i gjatë”, ka shtuar ai.

Ai ka kujtuar ushtarët amerikanë që dhanë jetën për lirinë dhe pavarësinë e Kosovës, si dhe për paqen në Ballkan, miqtë e Kosovës këtu në Amerikë, të cilët besuan në ne. Sipas tij, ata ofruan dritë në errësirë dhe ata ofruan ngushëllim në kohë trishtimi.

“Njerëz si kongresmeni Engel, senatori Dole, kongresmeni Lantos – shumë, shumë të tjerë që besuan në ne. Kur erdhi puna tek Kosova nuk kishte rëndësi nëse ishit demokrat apo republikan, dhe – jam i lumtur të shoh – që nuk ka rëndësi as tani”, ka theksuar ai.

Thaçi ka thënë se Kosova është i vetmi vend ku bulevardi i presidentit Clinton kryqëzohet me bulevardin e presidentit Bush, duke shprehur po kështu edhe falënderimin për diasporën.

“Diaspora jonë në Amerikë mësoi diçka të rëndësishme – duhet të punoni për të realizuar ëndrrat dhe ata kanë punuar shumë, kanë dhënë gjithçka për të realizuar ëndrrën e pavarësisë së Kosovës”, ka thënë Thaçi.

“Kurrë nuk do ta harrojmë natyrën e drejtë të luftës sonë, qëllimin e pastër të luftës sonë dhe rezultatin e bekuar të përpjekjeve tona. Në ditë të veçanta si kjo ne rikujtojmë të kaluarën, por dua të them një gjë për të ardhmen: Unë jam i bindur tani, më shumë se sa isha i bindur kur lexova Deklaratën e Pavarësisë dhjetë vjet më parë – se e ardhmja e Kosovës dhe e ardhmja e miqësisë sonë me Amerikën është e sigurt”, është shprehur Presidenti Thaçi.

“Ne do të mbetemi një partner i besuar i bashkësisë ndërkombëtare, në veçanti i Shteteve të Bashkuara”, ka theksuar ai.

“Kosova është një vend me popullsinë më të re në Evropë dhe synimi jonë për t’u bërë anëtar i BE-së, NATO-s dhe OKB-së do të arrihet”, ka thënë Thaçi.

“Jam krenar që jam President i shtetit më pro amerikan në botë”, ka theksuar Thaçi.

“Bota është një vend më i mirë sot për shkak të pavarësisë së Kosovës, dhjetë vjet më parë”, ka thënë ai në fjalën e rastit. (r.m.)

One Response to “Thaçi në Uashington: “Jam krenar që jam President i shtetit më pro-amerikan në botë””

Read below or add a comment...

  1. kreshniku says:

    Sa mire do te Ishta sikur te Ishta due delegation nga shqiperia.??
    E Kei theksuare se Rep.Kosoves esht me ekuilibrure.

Comment

*