Vermeulen: FMN-ja po e rishikon rritjen ekonomike në Kosovë

Prishtinë, 11 nëntor 2017 – Fondi Monetar Ndërkombëtar (FMN) po e rishikon parashikimin e tij për rritjen ekonomike në Kosovë gjatë vitit 2017, por ende konsideron se modeli i saj ekonomik është i paqënddrueshëm.

Kështu i ka thënë agjencisë Reuters, përfaqësuesi i FMN-së në Kosovë, Ruud Vermeulen.

“Aktualisht, ne jemi në procesin e rishikimit të parashikimeve tona”, tha Vermeulen gjatë intervistës së djeshme, duke theksuar se “ne kemi paraparë rritje 3.5% për këtë vit dhe vitin e ardhshëm, por fakt është se statistikat zyrtare tregojnë se tashmë ekonomia ka shënuar rritje prej 4.3%, gjatë pjesës së parë të vitit 2017”, ka thënë Vermeulen, transmeton Radio Evropa e Lirë.

Ai ka thënë gjithashtu se ekonomisë së Kosovës, me në popullatë prej 1.8 milion banorësh, i duhet ende një reformë strukturore.

“Rritja është e lartë, por mbështetet në një model të paqëndrueshëm, i udhëhequr nga konsumi dhe investimet në sektorët jo të tregtueshëm, që para se gjithash, financohen nga remitencat, dhe si rezultat është papunësia e lartë dhe aktivitet i ulët” , ka thënë Vermeulen.

Llogaritet se remitencat nga afro 800 mijë kosovarë që jetojnë në vendet perëndimore e përbëjnë afro 13% të prodhimit kombëtar. (r.m.)

Comment

*