Vetëvendosje: Haradinaj po ia vë vetes vulën e tradhtarit

Prishtinë, 25 shkurt 2018 – Lëvizja Vetëvendosje nuk lëviz nga pozicioni i saj kundër ratifikimit të versionit aktual të Marrëveshjes së Demarkacionit me Malin e Zi, pavarësisht marrëveshjes së drejtuesve të tri partive politike të koalicionit qeverisës dhe LDK-së.

Vetëvendosje, nëpërmjet një komunikate për medie, e gjykon ashpër këtë marrëveshje, të cilën e quan “pazar fjalësh që prapë ia humb Kosovës 8,200 hektarë”, kurse kryeministrin Ramush Haradinaj e quan “tradhtar që po fal toka të Kosovës”.

“Pas fjalëve të forta në seancën e së premtes në Kuvend, Kryeministri Haradinaj qenka marrë vesh me LDK-në për votimin e demarkacionit me Malin e Zi. E kanë shtuar fjalën ‘si orientim’ për raportin e Komisionit Bulliqi, duke dashur ta krijojnë përshtypjen që edhe po e përfshijmë Raportin që akuzon e rrënon Komisionin Meha, edhe të mos e marrim seriozisht atë. Kështu nuk shkruhen e nuk bëhen ligjet. Ky pazar fjalësh na i humbet 8,200 hektarë njësoj. Ky Projektligj ishte i padrejtë dhe i dëmshëm e tani bëhet edhe më i keq pas këtyre akrobacioneve; ai është krim dhe tradhti që duhet kundërshtuar e nuk duhet legjitimuar”, thuhet në komunikatë.

Vetëvendosje i akuzon PDK-në dhe LDK-në se e shfrytëzuan “ambicien vetjake të Ramush Haradinajt”  për t’i kaluar projektet e dëmshme për Kosovën.

“Siç duket, PDK-ja e LDK-ja janë në pajtim për ta shfrytëzuar ambicien vetjake të Ramush Haradinajt vetëm sa për t’i kaluar këto projekte të dëmshme. Më pas, kjo qeveri pa numra, edhe ashtu mund të bjerë. Nuk ka gjë më të keqe se sa kthimi në opozitë pas një qeverisjeje të dështuar. Kush mund të bashkëpunojë më me ty, nëse ia vendos vetes vulën e tradhtarit?”, thuhet në kpmunikatë.

Vetëvendosje e akuzon Haradinajn se po i fal 8,200 hektarë të Kosovës për të ruajtur karrigen e Kryeministrit.

“Duke qenë se Kryeministri i njeh mirë të gjitha argumentet kundër këtij versioni të demarkacionit dhe pavarësisht kësaj po do që ta kalojë e bën atë edhe më përgjegjës se të tjerët. Qëndrimi i tij është zmbrapsje. Ai është zmbrapsur me t’u bërë Kryeministër dhe po tërhiqet plotësisht tash kur e ka mundësinë që t’ia shpëtojë Kosovës 8,200 hektarë, ose t’i falë ato për të mbetur thjesht Kryeministër. Asnjë lakmi nuk mund të jetë mbi shtetin dhe territorin e Kosovën. Askush nuk është i autorizuar për të nxjerrë tokën e shtetit të Kosovës në pazare”, thekson Vetëvendosje.

“Ne nuk e mirëkuptojmë dhe as e kuptojmë zellin e askujt që shtyn një marrëveshje të tillë për vendin. Lëvizja Vetëvendosje nuk do ta votojë këtë Projektligj të dëmshëm. Lëvizja Vetëvendosje do ta kundërshtojë atë”, thuhet në komunikatën e kësaj partie. (r.m.)

Comment

*